KAMATI YA SIASA WILAYA YAAGIZA KITUO CHA AFYA MUGUNZU KIKAMILIKE NA KUFUNGULIWA MACHI 2023.

Imetumwa: February 23rd, 2023

Kamati ya Siasa ya Wilaya ya Kakonko imetembelea na kukagua mradi wa kituo cha Afya Mugunzu kilichopo Kata ya Mugunzu Wilayani Kakonko lengo ikiwa ni kukagua na kuangalia maendeleo ya utekelezaji wa ilani ya Chama Cha Mapinduzi (CCM) na kuagiza kituo cha afya kikamilishwe na kufunguliwa ifikapo mwishoni mwa mwezi Machi 2023 ili Wananchi waanze kupata huduma.        

Ziara hiyo iliyofanyika siku ya Jumatano tarehe 22 Februari, 2023 ikiongozwa na Mwenyekiti wa CCM (W) Ndugu Saamoja Ndilaliha, Katibu wa CCM (W), Mwenyekiti wa Vijana (W) na Katibu, Katibu Mwenezi (W), Mwenyekiti wa Wanawake (UWT) Wilaya, MNEC Mkoa, Mwenyekiti wa Wazazi, Mwenyekiti wa Halmashauri na  Mbunge wa Jimbo.

Kwa upande wa Pili timu ya Wilaya iliongozwa na Mkuu wa Wilaya ya Kakonko Col. Evance Mallasa, Mkurugenzi Mtendaji wa Halmashauri, Kaimu Katibu Tawala, Afisa Mipango, Afisa Ugavi, Mhandisi wa ujenzi pamoja na Mtendaji wa Kata ya Mugunzu.

Aidha kupitia ziara hiyo kamati ilibaini changamoto mbalimbali ikiwemo changamoto ya kuchelewa kukamilika kwa mradi huo hivyo kamati ilitoa ushauri kwa Halmashauri kutenga fedha ya makusanyo ya ndani itakayosaidia kukamilisha mradi huo, na kutoa maelekezo changamoto hiyo ifanyiwe kazi.

Mkuu wa Wilaya ya Kakonko Kanali Evance Mallasa amemhimiza Mkurugenzi Mtendaji kuendelea kusimamia mradi huo uweze kukamilika ili wananchi waanze kupata huduma, ameendelea kusema miradi inaongezeka hivyo ajitahidi kuboresha na kukamilisha miradi kwa wakati.

Mkurugenzi Mtendaji wa Halmashauri ya Wilaya ya Kakonko Ndaki Stephano Mhuli ameeleza kuwa kumekuwa na changamoto nyingi zilizosababisha kuchelewa kukamilika kwa mradi huo ikiwemo changamoto ya maji kupatikana mbali na eneo la mradi hivyo wamejipanga kufikia mwezi wa tatu 2023 mradi huo utakuwa umekamilika kwani wanapambana kuhakikisha wanakamilisha ili Wananchi waanze kupata huduma.

Kupitia ziara hiyo Wajumbe wa kamati ya siasa wametoa Ushauri kwa Watendaji wa Serikali kutumia mbinu mbalimbali katika kutatua changamoto zilizopo katika miradi inayoendelea kutekelezwa Wilaya ya Kakonko.

Mwenyekiti wa CCM Wilaya Mhe.Samoja Ndilaliha amehitimisha kwa kuiagiza Halmashauri kuhakikisha ujenzi wa Kituo cha Afya cha Mugunzu unakamilika kufikia Machi 2023 ili kuondoa changamoto ya Wananchi kupata huduma mbali na Makazi yao.