VIONGOZI WA ILEJE WAFANYA ZIARA YA MAFUNZO WILAYANI KAKONKO.

Imetumwa: March 28th, 2024

Mwenyekiti wa Halmashauri ya Ileje Mhe.Ubatizo Songa, Makamu Mwenyekiti, Mhandisi wa Ujenzi na Kaimu Katibu Tawala ya Wilaya ya Ileje wamefanya ziara ya mafunzo Wilayani Kakonko Jumanne Machi 26, 2024 na kutembelea baadhi ya miradi ya maendeleo.

Viongozi hao wamepokelewa na mwenyeji wao Mkurugenzi Mtendaji wa Halmashauri ya Wilaya ya Kakonko Ndaki Stephano Mhuli ambaye amewaeleza kuwa Halmashauri inatekeleza miradi mbalimbali ikiwemo ujenzi wa Ukumbi wa Halmashauri, stendi ya kisasa ya mabasi na wameanzisha kiwanda cha kufyatua tofali.

Timu hiyo imetembelea miradi hiyo na kueleza kuwa wameridhishwa na utekelezaji wa miradi hiyo ambapo walifika ili kujifunza kwani mmoja wa wakandarasi aitwaye Chiganda Construction Company ameshinda zabuni ya ujenzi Wilayani Ileje hivyo wamefika kuangalia miradi anayoisimamia ili kujiridhisha kwa macho kwani “kuona ni kuamini”, ameeleza Mwenyekiti Songa.