WANANCHI WAONYWA KUACHA KUFUMBIA MACHO VITENDO VYA UKATILI WA KIJINSIA.

Imetumwa: March 3rd, 2023

Halmashauri imewasisitiza Wananchi kutofumbia macho vitendo vya ukatili wa kijinsia vinapotokea katika jamii badala yake watoe taarifa kwa Viongozi ngazi ya Kata, Dawati la jinsia na kwenye Kamati zilizoundwa kwa ajili ya kudhibiti vitendo vya ukatili wa   kijinsia dhidi ya wanawake na watoto.

Akihutubia mkutano wa hadhara uliofanyika mwanzoni wa wiki hii siku ya Jumanne katika Kata ya Kasanda Wilayani Kakonko kwa Wananchi pamoja na Wanafunzi wa Shule ya Sekondari Kasanda, Afisa Maendeleo ya Jamii wa Wilaya Mustapha Mtungwe amesema kuwa  utoaji Elimu ni moja ya jitihada za kutokomeza ukatili wa Kijinsia kwa Wanawake na Watoto.

Bwana Mustapha ameeleza kuwa kumekuwa na vitendo vya ukatili dhidi ya wanawake na watoto vinavyofanyika katika ngazi ya kaya na shuleni wakati huohuo ukatili unaondelea kwa sasa ni ukatili dhidi ya watoto kwa watoto wenyewe hivyo amewasisitiza wazazi kuwafuatilia watoto wao kwa ukaribu wasifanyiwe vitendo hivyo na kuwaomba kuwa makini kwani kumekuwa na mashirika yasiyo ya kiserikali yanayotumiwa kutoa hamasa juu ya suala la ukatili wa kijinsia lakini wakati huohuo wanafundisha masuala yaliyo kinyume na maadili ya Watanzania.

“Tuendelee kushirikiana wote kwa pamoja kutokomeza vitendo vya ukatili wa kijinsi dhidi ya wanawake na watoto katika jamii zetu”, Alisema Afisa maendeleo ya Jamii Wilaya ya Kakonko Bwana Mustapha Mtungwe.

Naye Afisa maendeleo ya jamii  Bi. Safia Mjubeli amewaomba wananchi wasiogope kutoa taarifa pindi watakapongundua kuna mtu katika jamii anafanyiwa vitendo vya ukatili wa kijinsia na kuwasisitiza waendelee kushirikiana katika kuhamasishana na kutoa elimu kwa jamii kwani wengi wao wamekuwa wakifanyiwa vitendo hivyo na kukaa kimya hivyo tatizo kuendelea kuwa kubwa katika jamii inayowazunguka.

“Sisi  Maafisa Maendeleo ya Jamii tunahamasisha Jamii kuhakikisha vitendo hivi vinaisha katika jamii zetu hivyo tushikane mikono kwa pamoja tupinge ukatili wa kijinsia katika jamii”, Alisema Bi.Safia  Mjubeli.

 Mtendaji wa Kata ya Kasanda, Alexander Mwalemba amesema kuwa wamejipanga kuhakikisha wanatokomeza vitendo vya ukatili wa kijinsia katika jamii kwani vitendo hivyo vimekuwa vikitokea lakini kwa kushirikiana na jeshi la polisi wamejitahidi kuvizuia na wameandaa programu itakayosaidia kutoa Elimu kwa kamati zilizoundwa kwa ajili ya kushughulikia suala la ukatili wa kijinsia na kutambua majukumu yao kuhakikisha vitendo vinavyotokea katika jamii vinaripotiwa ofisi ya kata.

Naye Tabu Peter Mkazi wa kata ya Kasanda amesema kuwa wanawake wengi wanafanyiwa vitendo vya ukatili wa kijinsia hivyo amewaomba viongozi kuendelea kutoa elimu wasiishie ngazi ya kata tu na badala yake wafike kutoa elimu ngazi ya kitongoji kwani itasaidia zaidi kutokomeza vitendo hivyo. Vilevile amewashauri wanawake wanaofanyiwa vitendo hivyo wasikae kimya watoe taarifa sehemu husika ili wapate msaada.

Kuelekea siku ya Wanawake duniani Divisheni ya Maendeleo ya Jamii imefanya mikutano ya hadhara katika Kata mbalimbali pamoja na shule za Sekondari na Msingi kwa lengo la utoaji Elimu juu ya ukatili wa kijinsia dhidi ya wanawake na Watoto.

Divisheni ya Maendeleo ya Jamii imetembelea Kata ya Kasanda, Kiziguzigu, Kakonko na Kata ya Kanyonza na kufika katika shule mbalimbali ikiwemo shule ya Sekondari Kasanda, Buyungu na Kakonko  pamoja na shule ya msingi Ilabilo na Kihogazi.

Kauli mbiu ya maadhimisho ya siku ya Wanawake duniani mwaka 2023 inasema, “Ubunifu na mabadiliko ya Teknolojia, chachu katika kuleta usawa wa kijinsia”.

Siku ya Wanawake duniani huadhimishwa kila mwaka kuanzia Machi 1 na kufikia kilele Machi 8 ambapo mwaka huu Kiwilaya yataadhimishwa Machi 6 katika Kata ya Kasanda Wilayani Kakonko ambapo mgeni rasmi atakuwa Mkuu wa Wilaya Kanali Evance Mallasa.